ഹിലരി അക്കനു സ്നേഹപൂര്‍‌വം......

എത്രയും സ്നേഹമുള്ള ഹിലരി അക്കന്‍ അറിയുന്നതിന്‌,

ലക്ഷക്കണക്കിനു ഡോളറുകളു മുടക്കി കോണ്‍സുലേറ്റാപ്പീസും ചാരന്മാരെയും ഉണ്ടാക്കി ഈ മഹാരാജ്യത്ത് വിട്ടിട്ട് ഈ സാധനമൊക്കെയാണ്‌ അക്കനു വേണ്ടി ഈ മണ്ടകുണ്ടന്മാര്‍ ഇവിടുന്ന് കേബിള്‍ സന്ദേശമായി അയച്ചോണ്ടിരുന്നത് എന്ന് ഇപ്പഴാണ്‌ അക്കോ മനസിലാകുന്നത്. അക്കന്‍ ദയവ് ചെയ്ത് ഒരു കാര്യം ചെയ്യണം - ഈ കൊണാപ്പന്മാരെ അങ്ങോട്ട് തിരികെ വിളിക്കണം. എന്നിട്ട് ആ പൈസ കൂടി ഞങ്ങള്‍ക്ക് തരാമെങ്കില്‍ ഇതിലും നല്ല എരിവുള്ള സി പി‌ എം "വാര്‍ത്ത" ഞങ്ങള്‍ എഴുതി ആഴ്ചക്കാഴ്ച കമ്പിയടിച്ച് തരാം.

ഞങ്ങക്കാവുമ്പം ലേബറിന്‍ഡ്യേന്നോ സെന്റു തോമാ കോളേജീന്നോ കിട്ടുന്ന രണ്ടണ ഇംഗ്ലീഷു വാധ്യാമ്മാരു മതി ഞങ്ങളെഴുതി വിടണതൊക്കെ തര്‍ജ്ജുമ്മ ചെയ്തിങ്ങ് തരാന്‍. പോരാത്തേന്‌ ഞങ്ങക്കട വെബ്‌സൈറ്റീ ഇപ്പം ഇംഗ്ലീഷു വേര്‍ഷനുമുണ്ട്. ഒരു തൊകയിട്ട് കൊട്ടേഷനിങ്ങ് തരുമെന്ന് പ്രതീക്ഷിക്കുന്നു. ഇപ്പഴത്ത ഒരു അവസ്തേല്‌ തൊക ഡോളറായിട്ട്‌ എടുക്കാനില്ലെങ്കീ റബറായിട്ടായാലും മതി.

പി.എസ് : ക്ലിന്റണ്ണനു പഴയ നടുകഴപ്പ് ഇപ്പം ഇല്ലെന്ന് കരുതുന്നു.


സ്നേഹബഹുമാനങ്ങളോടെ,

വിനീതവിധേയര്‍,

കോട്ടയം ന്യൂസ് പേപ്പര്‍ അസോസിയേഷന്‍
കഞ്ഞിക്കുഴി പി ഓ.