Friday, March 13, 2009

ഉൽട്ടാ പുൽട്ടാ

മത്സരിക്കുന്ന 17 സീറ്റിലേക്കായി 69 സ്ഥാനാര്‍ത്ഥിമോഹികളുടെ ലിസ്റ്റ് സ്ക്രീനിങ്ങ് കമ്മിറ്റിയിലേക്കയച്ചാല്‍, എല്ലാ സീറ്റിലും ഒന്നില്‍ കൂടുതല്‍ പേരുകള്‍ നിര്‍ദ്ദേശിച്ചിട്ടുണ്ടെങ്കില്‍, ഏതെങ്കിലും ഒരു സീറ്റിലേക്ക് എത്ര പേരെ മാക്സിമം നിര്‍ദ്ദേശിക്കാം?

ഇത് സിമ്പിള്‍ കണക്കല്ലേ ചേട്ടാ...

എന്നാലുത്തരം പറ..

16 സീറ്റിലേക്ക് 2 വെച്ച് 32. മൊത്തം 69ല്‍ നിന്ന് ഈ 32 കുറച്ചാല്‍ 37. ഈ 37 എണ്ണത്തിനെ പതിനേഴാമത്തെ സീറ്റിലേക്ക് നിര്‍ദ്ദേശിക്കാം.

മുടുക്കന്‍. ഇനി ഇതില്‍ അബ്ദുള്ളക്കുട്ടിയുടെ കണക്ക് പറ.നോക്കട്ടെ.

17 സീറ്റിലേക്ക് 4 വെച്ച് 68. ബാ‍ക്കി 1 ഞമ്മക്ക്.

ലീഡറും കൊടുത്തിട്ടുണ്ട് ഒരു ലിസ്റ്റ്. സംഗതി ഒരു നടക്ക് പോവാനിടയില്ല. സ്ക്രീനിങ്ങ് കമിറ്റി ആപ്പീസിനു മുന്നില്‍ ആക്രിക്കച്ചവടക്കാരുടെ തെരക്കാണെന്ന് കേട്ടു ലിസ്റ്റുകളൊക്കെ അവസാനം തൂക്കി വിക്കുമ്പോള്‍ വാങ്ങിക്കൊണ്ടുപോകാന്‍.

ചേട്ടാ ലിസ്റ്റില്‍ പൊതിഞ്ഞ കപ്പലണ്ടിയുടെ പോഷകഗുണം മറ്റെന്തിനുണ്ട്? പപ്പിക്കുട്ടിക്ക് വീണ്ടും ഒരു ലക്ഷത്തില്‍പ്പരം വോട്ടിനു തോല്‍ക്കാനൊരു ചാന്‍സ് കിട്ടുമോ ആവോ? ലീഡറുടെ ലിസ്റ്റ് വേസ്റ്റ് ആവാതിരുന്നാ മതിയായിരുന്നു. എന്നാലും ഈ 69 ഇത്തിരി കൂടിപ്പോയില്ലേ എന്നൊരു സംശയം.

കാങ്ക്രസ്സല്ലേടാ.. 96 ആണ് കണക്ക്. ഇത്തവണ കുറഞ്ഞുപോയി. വലതില്‍ ഭയങ്കര ഐക്യം എന്ന് മുത്തശ്ശിമാര്‍ എഴുതുന്നത് 96നു പകരം 69 കണ്ടാടാ മോനെ..

എത്ര ലിസ്റ്റുണ്ടായാലും 17 പേര്‍ക്കല്ലേ നറുക്ക് വീഴൂ? ബാക്കിയുള്ളോരെന്ത് ചെയ്യുമെന്നാലോചിച്ചിട്ട് സഹിക്കുന്നില്ല. പാവങ്ങള്‍. ഗ്രൂപ്പുണ്ടാക്കുമായിരിക്കും.

നീ സമാധാനപ്പെട്. ഗോപപ്രതാപന്‍ തുറന്നു കാണിച്ച മാതൃക ഇങ്ങനെ കെടക്കുക അല്ലേ. ചിലരതിലെ പൊക്കോളും. കാങ്ക്രസ് ഒരു മഹാപ്രസ്ഥാനമാടേ. അങ്ങിനെ ഒന്നില്‍ ഓരോരുത്തരും ഓരോ പ്രസ്ഥാനമായല്ലെ പറ്റൂ. അവരെ ഗ്രൂപ്പ് എന്ന് വിളിച്ച് കൊച്ചാക്കാതെ.

സോറി ചേട്ടാ...

ഈ ലിസ്റ്റൊക്കെ അയച്ചെന്ന് വെച്ച് ഇതില്‍ നിന്നേ എടുക്കൂ എന്നൊന്നുമില്ല. മാഡത്തിനാണ് സര്‍വസ്വാതന്ത്യവും. ഇതിലൊന്നുമില്ലാത്തവനും കേറി വന്നേക്കും.

അപ്പോപ്പിന്നെ ഈ ലിസ്റ്റ്...

ചുമ്മാ ചൊറിയും കുത്തി ഇരിപ്പല്ലേടേയ്..വല്ല പണിയും വേണ്ടേ..തിരയെണ്ണാനും നക്ഷത്രമെണ്ണാനും മാത്രം പഠിച്ചാല്‍ പോരല്ലോ. ലിസ്റ്റുണ്ടാക്കിയും അതുകൊണ്ട് വഞ്ചിയുണ്ടാക്കിയും കളിച്ച് പഠിക്കെട്ടെഡേയ്..

3 comments:

  1. ഈ ലിസ്റ്റൊക്കെ അയച്ചെന്ന് വെച്ച് ഇതില്‍ നിന്നേ എടുക്കൂ എന്നൊന്നുമില്ല. മാഡത്തിനാണ് സര്‍വസ്വാതന്ത്യവും. ഇതിലൊന്നുമില്ലാത്തവനും കേറി വന്നേക്കും.

    അപ്പോപ്പിന്നെ ഈ ലിസ്റ്റ്...

    ചുമ്മാ ചൊറിയും കുത്തി ഇരിപ്പല്ലേടേയ്..വല്ല പണിയും വേണ്ടേ..തിരയെണ്ണാനും നക്ഷത്രമെണ്ണാനും മാത്രം പഠിച്ചാല്‍ പോരല്ലോ. ലിസ്റ്റുണ്ടാക്കിയും അതുകൊണ്ട് വഞ്ചിയുണ്ടാക്കിയും കളിച്ച് പഠിക്കെട്ടെഡേയ്..

    ReplyDelete
  2. good satire!kayyil vote enna "veto power" ulla nammal nokkiyorikkukayalle.pinne ivare parayunnathaenthinu?

    ReplyDelete
  3. ee 69 oru prathyeka number aanu ketto... Paraspara sahakaranathinteyum snehathinteyum pratheekam.

    ReplyDelete